इन्द्रेणीपोष्ट
कर्णाली, १५ साउनः कर्णाली प्रदेश सरकारअन्तर्गत भूमि व्यवस्था, कृषि तथा सहकारी मन्त्रालयले कृषि क्षेत्रको समृद्धिमा आफूलाई केन्द्रित गर्दै गत आर्थिक वर्षमा ६९ प्रतिशत वित्तीय प्रगति गरेको छ भने भौतिक प्रगतिमा औसत उपलब्धि हासिल गरेको छ ।
बुधबार आयोजित वार्षिक प्रगति समीक्षाका क्रममा मन्त्रालयले उक्त तथ्यांक सार्वजनिक गरेको हो । समीक्षा अनुसार कालिकोट कृषि विकास कार्यालयले सबैभन्दा उत्कृष्ट प्रदर्शन गर्दै ९६.६९ प्रतिशत वित्तीय प्रगति हासिल गरेको उल्लेख छ ।
मन्त्रालयका अनुसार ब्याज अनुदान कार्यक्रमअन्तर्गत प्रदेशका छवटा बैंकमार्फत रु. एक अर्ब ४४ करोड लगानी भई ५३५ जना कृषि व्यवसायी लाभान्वित भएका छन् । त्यसैगरी, गत आर्थिक वर्षमा ३६५ मेट्रिक टन अदुवा तथा बेसार जर्मनी निर्यात गरिएको छ ।
यस अवधिमा दुई हजार कृषक प्राङ्गारिक प्रमाणीकरण प्रक्रियामा सहभागी भएका छन् भने ७४७ वटा साना सिँचाइ योजनामार्फत २,१४२ हेक्टरमा सिँचाइ सेवा सुधार गरिएको र थप ९०० हेक्टरमा सिँचाइ सुविधा विस्तार गरिएको छ ।
मन्त्रालयले आगामी वर्ष कृषि यान्त्रीकरण, उत्पादन वृद्धि, बजारीकरण र जलवायु सहनशील कृषि प्रविधिमा विशेष जोड दिने जनाएको छ।
मंगलबार, भदौ १० गते २०८२
Aug 26 2025 Tuesday
